Violensia doméstiko i maltrato di mucha
Na Hulanda Karibense tin un lei spesial pa yuda hende ku mester di kuido òf sosten. E lei aki yama e Dekreto di Sosten Sosial i Lucha kontra Violensia Doméstiko i Maltrato di Mucha BES.
Meta di e lei aki ta pa garantisá ku hende por biba independiente mas largu posibel i partisipá aktivamente den sosiedat. Banda di esaki e lei ta duna espasio pa tantu siudadano komo profeshonalnan por mèldu na un sentro spesial, na momentu ku nan tin preokupashon tokante violensia doméstiko òf maltrato di mucha.
Ademas, profeshonalnan ta haña e derechi pa mèldu sin pèrmit di esnan enbolbí. Ta importante pa e profeshonal informá e kliente tokante esaki sí, pa tin transparensia i pa e kliente sa ki paso ta tuma. Mas aleu, sierto organisashonnan mester traha un kódigo di protekshon. Esaki ta un plan ku ta konsistí di pasonan ku mester sigui pa prevení i atendé ku violensia doméstiko i maltrato di mucha.
Kiko ta e kódigo di protekshon?
E kódigo di protekshon ta yuda hendenan ku ta traha den kuido di salú, enseñansa i otro sektornan sa kiko nan mester hasi na momentu ku nan ta preokupá pa violensia doméstiko òf maltrato di mucha. Tin sinku stap ku ta guia nan paso pa paso, for di momentu ku nan kuminsá preokupá te na e desishon tokante ki tipo di yudansa mester.
Dikon e kódigo di protekshon ta importante?
E kódigo di protekshon ta sòru pa profeshonalnan pensa bon tokante kiko ta mihó pa un hende ku por ta na peliger. Asina’kí nan por brinda e yudansa korekto i stòp e violensia.
Ken mester usa e kódigo di protekshon?
Personanan ku ta traha den e siguiente sektornan mester sigui e kódigo di protekshon si nan ta pensa ku tin violensia doméstiko òf maltrato di mucha:
- Kuido i asistensia
- Enseñansa i kuido di mucha
- Kuido pa hubentut (“Jeugdzorg”)
- Shèlter pa hende muhé
- Enseñansa obligatorio
- Sentronan di detenshon i Reclassering
Di e manera aki, nos ta traha huntu pa krea un ambiente seif pa tur hende.
E sinku pasonan di e kódigo di protekshon ta:
- Señalá
- Pidi konseho
- Kòmbersashon ku e pashènt, kliente, studiante òf mayor
- Inventarisá i evaluá
- Disidí: yudansa propio pa pashènt, kliente, studiante òf mèldu?
Bo mes ta eksperensiando violensia doméstiko òf maltrato? Òf bo ta sinti ku un otro hende ta den un situashon ku no ta seif? Sa ku bo no ta bo so. Tin vários organisashon ku por yuda bo.
Saba:
Domestic Safety Point
416 6936 / 416 3053
Sint Eustatius:
Statia Strong Support Hotline
318 4837